NIRMAL KUTCH

ચિલ્ડ્રન હોમ ફોર બોયઝમાં બાળકનો જન્મ દિન ઉજવાયો

આજ રોજ ભુજ ખાતે આવેલ સરકારી ચિલ્ડ્રન હોમ ફોર બોયઝમાં જીલ્લા કલેકટરશ્રી પ્રવિણા ડી.કે. ના માર્ગદર્શન હેઠળ તથા બાળ કલ્યાણ સમિતિના ચેરપર્સનશ્રી દિપાબેન લાલકાની ઉપસ્થિતિમાં બાળ સંભાળ ગૃહમાં રહેતા બાળકના જન્મદિવસની ઉજવણી કરવામાં આવી હતી. જેમાં જીલ્લા સમાજ સુરક્ષા અઘિકારીશ્રી એ.પી.રોહડિયાના માર્ગદર્શન હેઠળ જીલ્લા બાળ સુરક્ષા અઘિકારી, ચિલ્ડ્રન હોમ ફોર બોયઝ, ભુજના કર્મચારી મિત્રો અને જીલ્લા બાળ સુરક્ષા એકમના અધિકારીશ્રી વિપુલ ડોરીયા અને કર્મચારી મિત્રો દ્રારા બાળકના જન્મદિન નિમિતે બાળ સંભાળ ગૃહમાં આવેલ ખંડ સજાવવામાં આવેલ તેમજ જરૂરી વ્યવસ્થા ગોઠવવામાં આવેલ.
હાલ જીલ્લા બાળ સુરક્ષા એકમ હેઠળના બાળ સંભાળ ગૃહ ખાતે ૧૪ જેટલા કાળજી અને રક્ષણની જરૂરીયાતવાળા બાળકો સંસ્થામાં આશ્રિત છે. સંસ્થામાં નિયમિત રૂપે રાષ્ટ્રીય તહેવારો, સ્થાનિક ઉત્સવો તેમજ બાળકોના જન્મદિનની ઉજવણી કરવામાં આવતી હોય છે.

તમામ બાંધકામ શ્રમિકોને ઈ-નિર્માણ કાર્ડ નોંધણી કરાવવા અનુરોધ

ગુજરાત મકાન અને અન્ય બાંધકામ શ્રમયોગી કલ્યાણ બોર્ડ, ભુજ,બહુમાળી ભવન – ૨૧૮, ભુજ કચ્છખાતે નોંધાયેલ તમામ તેમજ નવા નોંધણી કરાવવા માંગતા તમામ બાંધકામ શ્રમિકો ને ઇ –નિર્માણ કાર્ડ બનાવવું ખૂબ જરૂરી છે,જે માટે જરૂરી આધાર પુરાવામાં આધાર કાર્ડ, ચૂટણી કાર્ડ/પાન કાર્ડ/લાઈસન્સ, રાશન કાર્ડ, રાશન કાર્ડમાં સમાવેશ તમામ વ્યક્તિના આધાર કાર્ડ, IFSC બેંક ખાતું ૯૦ દિવસ અથવા એના કરતાં વધુ દિવસ કામકાજ કર્યાનો અનુભવ આવકનો દાખલો આ તમામ પુરાવાઓની નકલ સાથે રાખી જીલ્લામાં ફાળવેલ પોતાના નજીકનાં સીએસસી કેન્દ્ર કોમન સર્વિસ સેન્ટર મધ્યે રૂબરૂ સંપર્ક કરી ઇ –નિર્માણ કાર્ડ કઢાવી લેવો. સીએસસી કેન્દ્ર – કોમન સર્વિસ સેન્ટર માં કાર્ડ ઇસ્યુ કરવા બાબતે કોઈ તકલીફ જણાય તો CSC જિલ્લા મેનેજર શ્રી પ્રિતેશભાઇ પરમાર – ફોન નંબર- ૭૦૧૬૦ ૪૭૩૪૦નો સંપર્ક કરવો. જેથી કરી રાજ્ય સરકારની યોજનાઓનાં લાભ મેળવી શકાય તેવું ડી. જે. પંડ્યા પ્રોજેકટ મેનેજર ગુજરાત મકાન અને અન્ય બાંધકામ શ્રમયોગી કલ્યાણ બોર્ડ, ભુજ-કચ્છ દ્વારા જણાવાયું છે.

કચ્છ પ્રભારી સચિવશ્રી હર્ષદ પટેલના અધ્યક્ષ સ્થાને રસીકરણ તેમજ કોરોના અંગેની સમીક્ષા બેઠક યોજાઇ.

કચ્છમાં પ્રથમ ડોઝમાં ૯૦% તેમજ બીજા ડોઝમાં ૮૬% રસીકરણ થયું

કોરોનાની સંભવિત ત્રીજી લહેર સામે પૂર્વતૈયારીઓ સાથે કચ્છ આરોગ્ય તેમજ વહીવટીતંત્ર સુસજ્જ

આજરોજ કચ્છ પ્રભારી સચિવશ્રી હર્ષદ પટેલના અધ્યક્ષ સ્થાને કચ્છમાં થયેલ રસીકરણ અંગેની કામગીરી તેમજ કોરોનાની ત્રીજી લહેર સંદર્ભે પુર્વતૈયારી અંગેની સમીક્ષા બેઠક કલેકટર-કચેરી ખાતે યોજાઇ હતી.

સમગ્ર વિશ્વ સાથે ભારતમાં પણ સંભવિત કોરોનાની ત્રીજી લહેર આવી શકે છે ત્યારે તેની પુર્વ તૈયારીના ભાગરૂપે કચ્છ આરોગ્ય તંત્ર દ્વારા શું-શું તકેદારી લેવામાં આવી રહી છે તેમજ કોરોના સામે રામબાણ તરીકે રસીને અગ્રતા આપવામાં આવી રહી છે ત્યારે કચ્છમાં રસીકરણના પ્રથમ ડોઝ અને બીજા ડોઝની સંખ્યા વગેરે વિશે ચર્ચા કરી જરૂરી સુચનો કર્યા હતા.

આ ઉપરાંત શ્રીહર્ષદ પટેલે ઓમિક્રોન તેમજ કોરોનાની સંભવિત ત્રીજી લહેરેને ધ્યાનમાં રાખી રસીકરણ પર ભાર આપવા જણાવ્યું હતું તેમજ ગ્રામિણ તેમજ શહેરી વિસ્તારોમાં સર્વે કરી બીજો ડોઝ બાકી હોવાના કારણો જાણી ગામ તેમજ વોર્ડ મુજબ ટાર્ગેટ કરી ફોલોઅપ લેવા સુચના આપી હતી.

કલેકટરશ્રી પ્રવિણા ડી.કે.એ પણ જિલ્લા આરોગ્ય તંત્ર તેમજ વહીવટી તંત્ર દ્વારા કોરોના તેમજ રસીકરણ સંદર્ભે લેવાયેલા પગલા વિશે છણાવટ કરી હતી.
મુખ્ય જિલ્લા આરોગ્ય અધિકારીશ્રી ડો.જનક માઢકે આ વિશે વધુ વિગતો આપતા જણાવ્યું હતુ કે, કચ્છમાં પ્રથમ ડોઝની ૯૦% જેટલી કામગીરી પુર્ણ થયેલી છે જ્યારે તેની સામે બીજા ડોઝ માટે એલિજીબલ લોકોમાંથી ૮૬% લોકોને બીજો ડોઝ અપાઇ ચુકયો છે જ્યારે બાકીના ૧૪%ના લક્ષ્યાંકને પહોંચી વળવા આરોગ્ય તંત્ર દ્વારા સઘન પ્રયાસો કરાઇ રહ્યા છે.

આ ઉપરાંત કોરોનાની ત્રીજી લહેર કે ઓમિક્રોન અંગે પુર્વ તૈયારીની વિગતો આપતા તેમણે જણાવ્યું હતું કે, ત્રીજી લહેર માટે તંત્ર સજ્જ છે નિયમિત ૩૬૦૦ આર.ટી.પી.સી.આર ટેસ્ટ, ૫૧ MT ઓક્સિજન ઉત્પાદન, ૪૧૦ આઇ.સી.યુ. બેડ, ૨૪૨૪ ઓક્સિજન બેડ તેમજ પુરતા સ્ટાફ સાથેની તૈયારીઓ સાથે કચ્છ કોરોનાને ટક્કર આપવા સક્ષમ છે તેમ જણાવ્યું હતું.

આ ઉપરાંત હર્ષદ પટેલે જિલ્લાના વિવિધ વિભાગોની કામગીરીની સમીક્ષા કરી હતી.

આ બેઠકમાં જિલ્લા વિકાસ અધિકારીશ્રી ભવ્ય વર્મા, અધિક નિવાસી કલેકટરશ્રી હનુમંતસિંહ જાડેજા તેમજ સંલગ્ન તમામ વિભાગના અધિકારી-કર્મચારીશ્રી ઉપસ્થિત રહ્યા હતા.
બળવંતસિંહ જાડેજા/અનિશ સુમરા ૦૦૦૦૦૦